Subida al cielo

Erakusketako lehen lana da, eta hari izena ematen diona. 2017an hasi zuen, eta Erresuma Batuan kokatuta dago, nagusiki. Lanaren abiapuntua da argazkiaren bidez irudi mitologikoago edo atenporalagoak sortzea, minarekin loturik, mina harturik elkartzen gaituen esperientzia gisa.

Eta asmo horren emaitza gisa, alboz albo ageri dira bi motatako erretratuak: bat, errealitate mundutarrari dagokiona, zeinetan sufritzen, pentsatzen, begiratzen eta amets egiten baitugu; eta bestea, pentsamendu edo amets horien xedearekin, irudimenarekin, mitologiarekin eta haren izakiekin lotuagoa, lasaitzen, baretzen eta beldurtzen (mozorroak, ikuskariak) duen dimentsioarekin lotua.

Aristócratas

Serie hau Galizian, bere sorterrian, desgaitasun intelektuala duen emakume talde bati arreta ematen dion erakunde erlijioso batekin lankidetzan sortua da. Bi udaz emakume horiekin izandako bizikidetzak eta egunerokotasuna haiekin partekatzeak aukera eman zion taldeari hurbiltzeko eta topagune bat sortzeko.

Esperientzia eraldatzaile hartatik abiatuta sortu zen argazkilaritzako lana egiteko aukera: «Orduan ekin nion ‘gaitasunaren’ ideiari buruz hausnartzeari, normaltasunari loturiko gizarte-eraikuntza gisa harturik; eta gogoetatzen hasi nintzen zer funtzio duen bereizteak –era honetako taldeetan bereizteak– gainerako gizartearentzat».

Las visiones

Las visiones Aste Santuko ospakizunak ditu ardatz, eta Espainiaren nortasun erlijioso antzinako eta kulturalaz dihardu.

Ribeira zuzenean hurbiltzen da Puente Genilen (Kordoba) duten tradizio erlijioso batera. Ospakizun horrek aukera ematen dio jolas egiteko errealitate horrekin eta alderdi espiritualago horrekin, halako eran non zentzua ematen baitio gai mundutarrago bati.                                                                                         

Artistak berak dioenez, «hemen, argazkia gertaera izan zen, gehiago; ospakizun sozialeko espazio baten barruan gertatzen den zerbait. Konturatu nintzen, ordea, edizio-prozesuarekin serietik ia erabat ezabatu ditudala prozesioari eta gertaerari bere horretan dagozkion aipamen oro».

La Jungla

Serie honetan, migrazioaren gaira hurbiltzen da, oso lurralde konplexu eta bortxazko batean,  Mexiko eta AEB bereizten dituen mugan.

La Jungla migrazioari buruzko proiektu kolektibo modura hasi zen, Magnumeko argazkilari talde batekin, eta Subida al cielo osatzen duten gainerako serieen kezka berak eta ikuspegi bera partekatzen ditu: espazio mugatu batean lan egiteko ideia eta han bizi diren pertsonekin lotura bat ezartzeko ideia.

Kazetaritzako hizkuntzatik urrun dagoen hizkuntza bat baliatuz, modu kontzienteki anbiguoagoan heldu zion proiektuari: «Irmo heltzen diot hizkuntza bisualaren anbiguotasunari, baieztapenik ez egiteko. Ongi dagoenaren eta gaizki dagoenaren gainean nabarmen ez eragitean datzan lerro mehe horretan mugitzen naiz, hori guztia zalantzan jarriz, gehiago. Sartzen naiz toki batzuetan non hartzen baitut nik ere posizio kaltebera eta uzten baitut besteek eraman nazaten, izateko edo elkarrekin erlazionatzeko beste modu batzuk eratzeko. Horregatik interesatzen zait hizkuntza bisuala hainbeste, asertibitaterik ez dagoelako».

Los afortunados

Los Afortunados obrarik berriena du. Melillan sortu zuen, Marokotik Europara iristeko ahaleginetan ziharduen gazte talde batekin.La Jungla lanean bezala, Lúa ohartzen da posible dela ezezaguna duen toki lan egitea eta bizikidetzaren bidez sortuz joatea lotura eta trukerako espazioak, zeinak atea ireki baitzien esanguratsuak izanik ere landuko zituenik sekula pentsatu ez zuen gaiei.

Artistaren asmoa da lan honen bidez modu metaforiko edo alegorikoagoanislatzea gazte horiek bizitzen ari diren arrisku egoerak, adrenalina, superbibentzia, estrategia iraunkorra eta anaitasuna, hainbat urtez eraikitzen ari den ikuspegi mediatiko horri aurre eginez.

Haren lanak liburu-formatuan plazaratu ditu Fishbarrek (Londres, 2017), eta orobat agertu dira Thames and Hudsonek argitaratzen duen Firecrackers: Female Photographer Now agerkarian, baita Raw View Magazine aldizkarian ere, "Women looking at Women" alean.

Bakarkako nahiz taldeko nazioarteko erakusketetan erakusgai izan ditu lanak, ICP (New York), Impressions Gallery (Bradford), Ffotogallery (Cardiff), Belfast Exposed, the Beijing International Photography Biennale eta beste zenbaitetan.